Институтот за применети истражувања за бизнис од Скопје е домаќин на тренингот со наслов “Корупцијата во бизнисот”, кој ќе се одржи од 1 Мај до 6 Мај 2025 година на езерото Младост во Велес. Овој тренинг ќе собере на едно место 25 млади и мотивирани луѓе од 14 држави во Европа, кои веруваат дека дигитализацијата е моќна алатка во борбата против корупцијата. Учесниците на тренингот ја споделуваат визијата дека транспарентноста и отчетноста се клучни за напредокот и општествената благосостојба.

Целта на овој тренинг е да ги подобри вештините и компетенциите на младинските работници од различни држави потребни за поддршка на владеењето на правото и промовирање на основните вредности како што се интегритетот, транспарентноста и отчетноста при справувањето со корупцијата. Учесниците ќе имаат можност да разменат знаења и практики за справување со корупцијата во бизнис секторот во земјите од Западен Балкан и други европски земји.

Овој тренинг е дел од Еразмус+ проектот за градење на капацитетите, на тема: “ Со дигитализација против корупција“, кој има за цел да се бори против корупцијата во ЕУ и Западен Балкан преку зајакнување на капацитетите кај младите со дигитални алатки. Проектот вклучува 18 партнери од 14 земји и е координиран од организацијата ЕПЕКА од Црна Гора. Институтот за применети истражувања за бизнис е партнер во овој проект.

Поддршката на пошироката општествена заедница, особено на граѓанскиот сектор, е клучна за успехот на борбата против корупцијата. Заедно, можеме да изградиме потранспарентно и поодговорно општество - придружете се на движењето!