Од 20 до 25 октомври 2025 година, проектен тим на Институтот за применети истражувања за бизнис учествуавше на петдневниот настан за учење, настава и обука „Digitally Empowered Wonder Learning“, кој се одржа во Виена, Австрија, во рамките на Еразмус+ проектот „Wonder Learning for Digital Natives“.
На тренингот, организиран од Primera: Zentrum für Pädagogische Fortbildung Vienna, учествуваа едукатори и партнери од Македонија, Турција, Босна и Херцеговина, Литванија, Романија, Австрија и Португалија. Настаноте беше посветен на развој на иновативни и дигитални педагошки вештини и создавање инклузивни и инспиративни училници што ја поттикнуваат љубопитноста и креативноста кај учениците.
Во текот на програмата, учесниците се запознаа со теми како креативно размислување, употреба на вештачка интелигенција во образованието и безбедност во дигиталната средина. При интегрирањето на технологијата во наставата, фокусот не беше само на користење уреди и апликации, туку на постигнување на петте цели на учење според методологијата „Чудесно учење” (анг.Wonder Learning): поврзување, комуникација, селектирање, соработка и креирање. Настанот вклучи и други едукативни и културни активности, помеѓу кои и посета на Канцеларијата на Обединетите нации во Виена, каде што учесниците присуствуваа на сесија за Целите за одржлив развој (SDGs) на ОН.
Престојот во Виена овозможи нови партнерства, инспирации и идеи за современо, дигитално и инклузивно образование.
Слики од тренингот
Што е проектот Wonder Learning for Digital Natives?
Wonder Learning for Digital Natives (бр. 2024-1-PT01-KA220-SCH-000254381) е Еразмус+ проект координиран од Escola B1/PE do Monte од Мадеира, Португалија. ИАРБ е партнер во проектот, заедно со институции од Португалија, Романија, Австрија, Босна и Херцеговина, Литванија и Турција.
Проектот промовира иновативни методи во наставата и учењето и развива дигитални вештини преку методологијата WonderLearning. Брошурата за најдобри образовни практики содржи 34 проверени педагошки практики, а партнерите подготвуваат и курс за обука и водич за наставници. Преземете ја брошурата за најдобри образовни практики.